Hasiera

Oharrak:

Ongi etorri HerriKrosa.es-era

BILBOKO HERRI KROSA duela 30 urte sortu zen, eta hasiera-hasieratik, alternatiba desberdin eta berritzailea izan da, hala funtsezkoenean, printzipioetan eta filosofian, nola gainerako alderdi formal hutsetan.

Hasieran bagenekien egin beharrekoen eremua oso zabala zela, eta denborak hala izan dela frogatu digu. Eginkizun horietarako, gainera, azterketa sakona egin behar zen, eta baliabide egokiak aurkitu, hasiera-hasieratik anbizio handiko proiektu batean murgildu, ordura arte eskaintza egoki eta tentagarririk aurkitu ez zuten hiritarrak –asko– kirol aktibora erakartzeko.

Gure filosofia oso berezia da, lasterketa amaitzean parte-hartzaile guztiak baitira irabazle. Hain zuzen ere, filosofia horri esker, zenbait balore orokortzea lortu dugu (ilusioa, osasuna, aisia, erronka, lehiakortasuna, etab.), baina balore bakoitza nork bere erara egokitzen du, bere gustuen, aukeren eta itxaropenen arabera.

Beraz, BILBOKO HERRI KROSean parte hartzeko modua erabat pertsonala da: batzuk denekin lehiatzen dira; beste batzuk, bere buruarekin edo lagunekin, eta badira inorekin lehiatzen ez direnak ere. BILBOKO HERRI KROSAren eskaintza oso zabala da, parte-hartzaile bakoitzak beretzat egokiena aukera dezan, jakinik denak direla aintzat hartuak eta errespetatuak, jarrerak desberdinak izanik ere.

Igarotako urte hauen ondoren, onartu beharra daukagu –hasieran harriduraz, eta atsegin handiz beti– emaitzak txundigarriak izan direla. Horren erakusgarri dugu milaka parte-hartzaileren gogobetetzea; izan ere, lasterketa-egunean Bilboko kaleetan barrena izerditan, arnasestuka eta poz-pozik kamiseta berdinak jantzita ikusteak irudi estetiko paregabea sortzen du, eta bizitzeko jarrera positiboz betetako arteria bihurtzen dira, horrela, Bilboko kaleak.